Prezenca e OSBE-së dhe Inspektorati Shtetëror i Punës nisin fushatën për të drejtat e punëtorëve në Shqipëri

Prezenca e OSBE-së në Shqipëri, në bashkëpunim me Inspektoratin Shtetëror të Punës, ka nisur një fushatë ndërgjegjësuese për të forcuar mekanizmat e mbrojtjes në vendin e punës dhe për të ndihmuar në parandalimin e abuzimit dhe të shfrytëzimit në punë, me fokus të veçantë te punëtorët e huaj.

“Fushata i përgjigjet profilit në zhvillim të tregut të punës në Shqipëri, ku numri i punëtorëve të huaj është rritur në vitet e fundit. Kjo e bën edhe më të rëndësishme njohjen me të drejtat e punës, mekanizmat e mbrojtjes dhe shërbimet mbështetëse të disponueshme”, tha Kryetari i Prezencës, ambasadori Michel Tarran, në një takim me Kryeinspektorin e Punës Eljo Muçaj, më 26 qershor 2026, që shënoi nisjen e fushatës.

Fushata zhvillohet përmes kanaleve të komunikimit të Inspektoratit Shtetëror të Punës dhe të Prezencës së OSBE-së. Ajo ofron informacion praktik për t’i ndihmuar punëtorët të kuptojnë më mirë të drejtat e tyre, të kenë qasje në informacion mbi sigurinë dhe shëndetin në punë dhe të mësojnë si të përdorin mekanizmat e ankesave dhe shërbimet mbështetëse institucionale. Fushata, gjithashtu, thekson rolin thelbësor të inspektorëve të punës në garantimin e zbatimit të legjislacionit të punës, promovimin e kushteve të sigurta dhe të drejta të punës dhe identifikimin e situatave të abuzimit dhe shfrytëzimit të punës, përfshirë rastet që mund të përbëjnë trafikim të qenieve njerëzore.

Fushata zhvillohet në kuadër të projektit të Prezencës së OSBE-së kundër trafikimit të qenieve njerëzore, të financuar nga Mbretëria e Bashkuar, Norvegjia, Irlanda dhe Italia. Ajo është pjesë e përpjekjeve më të gjera të Prezencës për të forcuar përgjigjen e Shqipërisë ndaj shfrytëzimit në punë dhe trafikimit të qenieve njerëzore përmes parandalimit, forcimit të kapaciteteve institucionale dhe rritjes së ndërgjegjësimit publik.