Prezenca e OSBE-së mbështet profesionistët e drejtësisë në Shqipëri në forcimin e aftësive për kërkimin ligjor, shkrimin dhe arsyetimin ligjor

Prezenca e OSBE-së në Shqipëri, në bashkëpunim me Shkollën e Magjistraturës, organizoi një trajnim të specializuar dyditor për profesionistët e drejtësisë, me fokus kërkimin ligjor, shkrimin dhe arsyetimin ligjor, më 6-7 tetor 2026.

Në trajnim morën pjesë rreth 25 këshilltarë ligjorë, ndihmës ligjorë dhe sekretarë gjyqësorë nga Prokuroria e Posaçme kundër Korrupsionit dhe Krimit të Organizuar (SPAK), Gjykata e Posaçme e Apelit, Gjykata e Lartë, Gjykata e Apelit të Juridiksionit të Përgjithshëm, Gjykata Administrative dhe Gjykata Administrative e Apelit.

Trajnimi synoi forcimin e aftësive profesionale të pjesëmarrësve për kryerjen e kërkimit dhe analizës së thelluar ligjore, si edhe për hartimin e dokumenteve ligjore të qarta, koherente dhe të argumentuara mirë. Këto aftësi kontribuojnë në cilësinë, transparencën dhe efektivitetin e punës në sistemin gjyqësor.

Pjesëmarrësit trajtuan parimet kryesore të kërkimit dhe arsyetimit ligjor, si dhe qasje bashkëkohore për hartimin e dokumenteve ligjore, duke përfshirë përdorimin e terminologjisë së saktë ligjore dhe të një stili të qartë e profesional të të shkruarit. 

Sesionet ndërvepruese, ushtrimet praktike dhe diskutimet në grup nxitën të nxënit aktiv dhe shkëmbimin e përvojave mes kolegëve. Katër ekspertë të nivelit të lartë, dy vendas dhe dy ndërkombëtarë, udhëhoqën studime rastesh dhe diskutime të bazuara në shembuj konkretë, me rëndësi për punën e përditshme të pjesëmarrësve. 

Kjo qasje u mundësoi pjesëmarrësve të zbatonin konceptet dhe teknikat e trajtuara gjatë trajnimit në detyra konkrete ligjore.

Trajnimi është pjesë e mbështetjes së vijueshme të Prezencës së OSBE-së në Shqipëri për përpjekjet e vendit në kuadër të reformës në drejtësi, me fokus forcimin e kapaciteteve profesionale dhe kontributin në rritjen e integritetit, efikasitetit dhe transparencës në institucionet gjyqësore.