Prezenca e OSBE-së trajnon transmetuesin publik shqiptar për raportimin e zgjedhjeve

Redaktorë dhe gazetarë të transmetuesit publik shqiptar po trajnohen për raportimin e zgjedhjeve, në një kurs intensiv treditor, që filloi më 21 prill 2015 në Tiranë.

Trajnimi, i organizuar nga Prezenca e OSBE-së në Shqipëri, në bashkëpunim me Bashkimin Evropian të Transmetuesve (EBU), Radio-Televizionin Shqiptar (RTSH) dhe “Eurovision Academy”, zhvillohet dy muaj përpara zgjedhjeve vendore.

“Qëllimi i këtij trajnimi, përveçse të ndihmojë në sigurimin e një raportimi zgjedhor më profesional, të paanshëm dhe të balancuar, është edhe të nxisë kalimin nga transmetimi i deklaratave politike në raportime që përqendrohen te problemet e komuniteteve vendore”, tha këshilltari i Prezencës së OSBE-së për Zhvillimin e Medias, Vojislav Raonic.

Kursi do të fokusohet te roli dhe përgjegjësitë e reporterëve të zgjedhjeve, funksionimi i institucioneve të administrimit zgjedhor, ndarja e re administrativo-territoriale, si dhe te pasqyrimi i interesit të qytetarëve në mbulimin e zgjedhjeve.

Një pjesë e trajnimit do t'u kushtohet ndryshimeve të fundit në Kodin Zgjedhor, që përcaktojnë se gjysma e kandidatëve për këshilltarë bashkiakë duhet të jenë gra, si dhe rekomandimit të OSBE/ODIHR-it që transmetuesi publik të mund të ketë në vëmendje nxitjen aktive të pjesëmarrjes së grave, duke u dhënë kandidateve mbulim më të gjerë në lajme.

Trajnimi bën pjesë në përpjekjet e Prezencës së OSBE-së në Shqipëri për të mbështetur zhvillimin e mëtejshëm të Radio-Televizionit Shqiptar si një transmetues publik editorialisht i pavarur, i qëndrueshëm dhe i përgjegjshëm para publikut. Më herët gjatë këtij viti, Prezenca e OSBE-së dhe EBU-ja zhvilluan për redaktorët dhe reporterët e RTSH-së një trajnim pesëditor për paanësinë në raportimin e lajmeve.